[影評] 衝鋒車 [上映中] - 四星

衝鋒車, 先唔講好唔好睇住, 淨係睇Cast, 都幾猛料, 有吳鎮宇, 任達華, 譚耀文, 鄭浩南, 仲有最近不停拍野的姜皓文, 個個都獨當一面架 (除左古巨基之外...), 究竟今次大匯聚, 炒埋一碟, 好唔好睇呢 ?? 答案係~~~ 好睇既~

呢部戲雖然劇情唔係話好特別, 好創新, 但就非常富有香港地道特式兼少少黑色幽默, 例如大部份都係港式笑話, 港式粗口, 身為香港人的你, 一定會好有投入感, 特別係果d 粗口, 尤其係出自呢班巨星+諧星的口, 往往令觀眾忍唔住笑出黎, 但呢個都係呢部戲的不足之處, 因為搞笑場口盡可能都應該由劇情同演技做出黎, 而非用粗口文化, 當然, 始終係令到你笑到既, 仍然有娛樂性, 而部戲劇情其實好無厘頭, 有唔合理的地方, 例如自己話偷廢棄警車難偷, 但係又可以逐件parts 偷, 然後砌部警車出黎, ""聽落就好似幾穩陣, 但係隱隱約約又覺得幾on9"" <--- 有睇就明, 不過小弟我一向唔強求電影情節合理, 好睇, 有娛樂性就得 ! 所以呢部係幾岩我呢種人睇的~ (識我的都知我本身就係無厘頭文化 XD)

我可以講, 全套戲基本上無乜悶場, 能夠令我睇足全程, 絲毫想check下電話訊息的念頭都無, 因為劇情同演員實在吸引, 每個場口都總有些笑位同意想不到, 例如荒亂中以為救走了同伴, 卻係賴低左係敵人果邊, 而救走了敵人, 搞到要玩交換人質, 係幾有趣既~ 身為壞人的佢地, 又竟然會係亂世中警惡懲奸~ 而美中不足的地方, 可以話係有關古巨基的情節, 性格特點唔夠出, 又無咩特別, 唯一悶的時候都係出現係古巨基身上, 加上佢演技未夠熟練, 當然就被一班巨星比下去, 仲有就係唔太明點解要用"小強"做背景去貫徹全套戲, 然後做首尾呼應, 有呼應同總結係好事, 但就唔知點解要用"小強", 諗唔明亦唔想深究.

整體黎講, 呢套我比四星半, 近期罕見又有戲情又有笑料, 無厘頭文化又見少買少, 加分啦 !! 而人物角色設定同描寫係非常好的, 因為四大主角的性格同特點係好出的, 你睇完之後仍然會好記得佢四個人, 我建議呢套戲係必睇的, 至於值唔值得入戲院, 我認為唔一定要, 但當係同朋友消遣下笑下就絕對無問題.