[影評] 被奪走的12年 [上映中] - 三星

三星
被奪走的12年, 其實好多時d 戲, 都係鍾意台灣譯名多d...台譯為<為奴十二年>, 簡單而明快, 一睇就知做左十二年奴隸, 點似香港個名, 到底奪鬼左d 乜鬼野走姐.... 呢套戲發生係美國以前, 仍然有黑奴的年代, 即逢係黑人, 就大多貶你為奴隸, 雖然有部份受眷顧或有才能的黑人家庭, 會得到"自由身"証明, 不過說到尾, 仍然係受盡岐視煎熬.

今次主角其實係自由身, 一名有才有藝的黑人, 可惜遇人不淑, 被出賣成為奴隸, 內容大致就係講佢由正常人, 轉變為黑奴的心路歷程, 當中你會見到黑奴真係好陰公, 完全無地位可言, 不過, 卻仍然存在主僕之情, 總有好主人, 會欣賞同寬待奴隸, 不過呢, 說到底都係主僕關係, 無任何一個人肯幫佢証明佢係自由身, 甚至怕影響到自己, 最終都係送走你, 同時亦看到作為一個僕人, 做得出色又死, 比其他人妒忌同恰死, 做得唔好又死, 比主人鞭鞭到肉而死, 又偶爾交熾於男主人與女主人之間複雜關係, 慘變中間人甚至醜人, 苦不堪言.

其中一幕講到, 一對母子一齊做黑奴(背後原因不詳)... 仲同主角一齊送到黑奴介紹所(即類似現今賓寘介紹所), 然後被一眾有錢佬選購... 有個有錢佬買左佢個仔, 佢阿媽就不停話"買埋我!!買埋我!!我地唔可以分開!!", 可惜個有錢佬嫌太貴, 講價又講唔成, 於是決定都只係買個仔... 就咁呢對母女就從此天各一方... 真悲慘 !! 呢部戲可以看盡以前美國佬黑奴制度的醜惡同腐敗...

如果入戲院睇的話, 會幾悶, 除非你好有興趣啦~

[影評] 末日公投 [不日上] - 四星

四星
拿拿拿, 緊貼我的blog, 就有好介紹~XD, 一向喜歡尋找獨特idea電影的我, 今次又有好野~ 有否想過, 當人類步向末日災難(eg.輻射), 而存在一個供避難的堡壘, 內存有足夠生存一年的基本物資, 而一年後, 輻射災難過去, 人類要負擔重建人類文明社會的重任, 而問題就是, 堡壘只可以足夠應付十個人住, 你會點樣決定比邊十個人入住呢 ??

此電影看起來好似係一套災難片, 實際上係一套哲學片, 因為實情係一班哲學學生, 同老師做緊一個學期末的思考實驗, 模擬及假想發生災難後的情況, 全班人20數人, 每人會被隨機分派一個職業, 代表左佢的基本能力, 例如有農夫, 歌舞者, 工程師, 電工, 地產商, 而全班人就需要一起公投, 到底應該選哪十個人/職業住入堡壘, 在災難後重建社會呢, 當然聰明的你, 直覺就會知道要揀農夫, 靠佢種田提供食物, 揀工程師, 無論建築d乜野, 都要靠佢, 但你就一定唔會揀歌舞者, 因為根本對重建社會無用, 當然唔會留其中一個位置比佢, 而都唔會揀地產商, 地球上的房屋都玩完倒塌哂, 要佢黎把鬼咩~ 但當你真正處身實景, 你的選擇, 很可能會不一樣, 有興趣請看此電影追尋 XD

雖然我唔太熟識哲學, 但都大概明白套戲表達的意義, 好多時人的分析會基於理性 VS 感性(情感), 係討論的時候, 往往會以理性為一切, 哲學亦係主要甚至全部以理性分析為前題, 但呢部戲就想帶出, 當人做決定的時候, 往往都會被感情所蒙蔽(又唔一定壞事既), 作出的決定亦有不同, 而當面對人類毀滅的命運, 是否又一定要抵抗而生存呢 ?? 不過片尾結局, 我就唔多鍾意, 甚至有種 "下, 咩料" 的感覺, 不過佢其實都只係想更明顯地帶出上面的意義吧了~
呢部戲實有3.5星, 有0.5星為創意加分

可能你會問, 點解不日上映但我都睇左既, 請嘗試搜尋英文名字吧~ 再有問題先問我啦 XD 不解釋了~

下午茶 - 豬扒面, 啤酒

日前竟然被朋友出賣~ XD
佢將小弟一篇facebook張貼的小品文章, share比網路紅人 - 達哥
亦有幸被達哥加入到佢的潮文集中, 並於youtube口述一次出來 XD
其實有人分享予其他人, 仲得到他人認同, 都幾開心的^^
有興趣可到下面條link 睇睇
https://www.youtube.com/watch?v=guxi3uxjvbU&feature=youtu.be


補上原文:
有日去餐廳食下午茶，對面岩岩黎坐左個男人，佢唔洗望餐牌，就叫 豬扒面，啤酒，我即時心諗，乜料，下午茶飲啤酒咁唏噓，而且個侍應都絲豪無改面容照落單，可能個男人係常客，之後我好奇要加幾錢，望望佢張單，WTF !! 唔洗加錢，咁我下次又試下先，等左陣，佢的野食黎左，野飲都跟手到埋，我見佢望一望杯野飲窒一窒，原來黎左杯熱咖啡，但佢竟然無嬲喎，仲飲左兩啖添，然後繼續食野...
諗下唔對路，小喇叭原來佢頭先係叫 “啡走“！

[影評] 直航殺機 [上映中] - 四星

四星

直航殺機, 呢套係一套我自己睇中, 而決定去看的一部電影, 果然我的眼光一d 都唔差 XD, 同行友人都話好睇~ 內容大概係講一個FBI(好似係)坐飛機的時候, 突然收到一個訊息, 威脅要存一筆巨款到某個戶口, 否則就會每20分鐘殺死機上的任何一個人, 一睇就知道係懸疑味重的片, 最適合小弟喇XD, 都要歸功於佢的trailer 幾引人入勝.

全片除左開頭少部份篇幅略為沉悶之外, 打從收到突如其來的訊息後, 就一直緊張到結局, 都可謂80%無悶場~ 如果你以為只係單純20分鐘就有兇手殺害一個乘客咁簡單, 你就錯了~ 透過匪徒精心的佈局, 佢要殺人唔係直接出手, 而係好聰明地完美殺人, 甚至有出現過<金田一>的密室殺人事件, 認真西利 !! 整件事都發生在飛機上, 但卻能夠做到一連串緊張刺激的驚險高潮, 我一向欣賞呢d 低成本大效果的電影 XD, 有種與 <來電險事> 與 <活埋> 的感覺~ 咩話你未睇過 ?? 咁建議你即刻去睇返~

全片最驚險, 甚至去到心跳加速有點窒息的感覺的地方, 就係臨完之前的墜機場口, 真係好逼真又緊湊, 而缺點係, 始乎比觀眾估誰是兇手的hints 太少了, 劇情主導一切, 無乜地方比觀眾留有追查兇手的感覺, 可算是唯一美中不足吧~

這絕對是一部值得入戲院睇的戲啊 !!

[影評] 絕地孤軍 [上映中] - 三星

三星
絕地孤軍, 顧名思義, 就真係講係絕地裡孤獨無助的軍隊(小隊), 是為一套戰爭打仗片咯, 可惜打得唔夠激, 始終只係一個小隊對抗一大堆軍備不良的塔里班叛亂份子, 如果你期待好激烈的大規模軍事對疊, 對唔住喇, 呢套戲唔岩你, 佢絕對唔似金牌戰爭片<黑鷹15小時>咁有戰爭意味, 如果你無睇過<黑鷹>, 咁就千奇唔好自稱軍事片迷=.=", 你的睇戲經驗非常淺!!

呢套<孤軍>, 先唔講老套劇情呢d啦~ 一向戰爭片黎黎去去都係果d劇情, 但呢套的主角們, 個個都好似打不死咁, 不停中槍又再中槍, 喂, 流血都會流死啦下話? 無錯, 雖然話打緊仗, 人的腎上線素增加, 會令人暫時忘卻痛楚, 都唔會似戲中咁離譜丫, 而且d 塔里班呢, 喂你軍備幾差, 眼界幾差, 一碌火箭炮射左十次都有(係人都知火箭炮打一個範圍爆炸,好難射唔中), 射極都射唔中對方, 你會唔會離譜左少少, 不如返鄉下耕田啦, 或者上網打下battlefield先啦, 學咩人做叛亂份子姐...
而打緊果時, 呢支孤軍, 因為敵方人數眾多, 而不停後退, 仲退到要跳懸崖落山, 都幾高下, 直頭跳完會碌落山果隻, 唔係跳飛機咁跳完企係度, 神奇的係, 佢地反覆跳左兩至三次山,  都無人因為跳山而重傷...痛左一陣就起身行得走得, 老實講... 跳山的重創程度唔會低過中傷囉...

不過唯一有個位幾值得深思下既, 就係佢地意外地捉住左塔里班的牧民, 做緊任務唔能夠長期困住佢地, 如果放虎歸山, 佢地實報串, 轉頭就成支軍隊暴民黎覆卓, 如果殺左佢地, 日後會落得千古罵名, 罵你殺左手無寸鐵的俘虜, 呢個人性同理性的心理矛盾, 比著係你, 你會點做呢 ??

建議各位如果唔係軍事迷, 都係唔洗入戲院睇喇~